جىننىڭ بارلىقىغا ئىشىنەمسىز ياكى ئىشەنمەمسىز؟نېمە ئۈچۈن؟

(1)

جىننىڭ بارلىقى

 

جىنلارنىڭ بارلىقى شەكسىز كەسكىن پاكىتلار بىلەن ئىسپاتلاندى، شەكسىز ئىسپات دېگىنىمىز قۇرئان كەرىمنىڭ جىنلار توغرىسىدىكى كەسكىن بايانلىرىدۇر.

قۇرئان كەرىم بىر قانچە ئورۇنلاردا جىنلارنىڭ بارلىقى توغرىسىدا خەۋەر بەردى:

مەسىلەن، ئاللاھنىڭ:"جىنلارنى، ئىنسانلارنى پەقەت ماڭا ئىبادەت قىلىش ئۈچۈنلا ياراتتىم"،(زارىيات سۈرىسى،56-ئايەت)دېگەن سۆزى.

يەنە:"(ئى مۇھەممەد!) ئۆز ۋاقتىدا بىر تۈركۈم جىنلارنى ساڭا قۇرئان تىڭشاشقا ئەۋەتتۇق"،(ئەھقاف سۈرىسى،29-ئايەت).

يەنە:"(اللە) ئىنساننى (يەنى ئاتاڭلار ئادەمنى) (چەكسە جاراڭلايدىغان) ساپالدەك قۇرۇق لايدىن ياراتتى.جىنلارنى ئوتنىڭ يالقۇنىدىن ياراتتى"،(رەھمان سۈرىسى،14-15-ئايەتلەر).

قۇرئان كەرىم ئايەتلىرىدىن سىرت ھەدىس شەرىپلەردىمۇ جىنلارنىڭ مەۋجۇد ئىكەنلىكىنى ئىسپاتلايدىغان سەھى ھەدىسلەر زىكىر قىلىندى.

جىنلارنىڭ بارلىقى قۇرئان ۋە سەھى سۈننەتتە زىكىر قىلىنغان كەسكىن پاكىتلارغا تايانغانلىقى ئۈچۈن، مۇسۇلمانلار جىنلارنىڭ بارلىقىغا ئىشىنىش ئاللاھغا ئىشىنىشىنىڭ ئاساسلىق تەلەپلىرىدىن بىرسى ئىكەنلىكىگە بىرلىككە كەلدى.شۇنداقلا جىنلارنىڭ بارلىقىنى ئىنكار قىلىش ياكى شەك قىلىشنىڭ ئىسلامدىن چىقىرىپ تاشلايدىغانلىقىغىمۇ بىرلىككە كېلىشتى.

جىنلارنى ئىنكار قىلىش ئىككى تۈرلۈك نەتىجىنى كەلتۈرۈپ چىقىرىدۇ:

بىرىنچىسى:ئىسلام دىنىدا كەسكىن ئىسپاتلانغان نەرسىنى ئىنكار قىلغانلىقتۇر.

ئىككىنچىسى:ئاللاھ تائالا تەرىپىدىن كەلگەن كەسكىن پاكىتقا ئىشەنمىگەنلىكتۇر،قۇرئان كەرىمنىڭ كەسكىن پاكىتلىرىغا ئىشەنمەسلىك ئاللاھغا ئىمان كەلتۈرۈشكە زىت كېلىدۇ،شۇنداقلا قۇرئان كەرىمگە ئىمان كەلتۈرۈشكىمۇ زىت كېلىدۇ.

مانا بۇ ئىككى نەتىجىنىڭ ھەر بىرى ئىسلام ۋە ئاللاھغا ئىمان كەلتۈرۈشنىڭ قىممەت قاراشلىرى بىلەن زىتلىشىدۇ.

(2)

جىنلارنىڭ ئەسلىسى

جىنلارنىڭ نېمىدىن يارىتىلغانلىقىنى بىلىشنىڭ بىردىن بىر ئاچقۇچى كەسكىن خەۋەردۇر، خەۋەر ئاللاھ تەرىپىدىن كەلسە كەسكىن خەۋەر بولىدۇ،بۇ توغرىدا قۇرئان كەرىمدە ئېنىق خەۋەر كەلگەن:"جىنلارنى ئوتنىڭ يالقۇنىدىن ياراتتى"،(رەھمان سۈرىسى،15-ئايەت).

جىننىڭ نېمىدىن يارىتىلغانلىق خەۋىرى كەسكىن خەۋەر بىلەن ئىسپاتلانغان ئىكەن، ئۇ چاغدا بىزنىڭ ئۇ خەۋەرنىڭ مەزمۇنىنى بىلىش ۋە ئۇنىڭغا ئىشىنىشىمىز زۆرۈر بولىدۇ.

(3)

جىننىڭ بارلىقىنى ئىنكار قىلىش ئىلىم-پەن تونىغا ئورىنىۋالغان بىمەنىلىك ۋە ئەخمەقلىق

 

يۇقىرىقى ھەقىقەتنى بىلگەن بولسىڭىز، شۇنى بىلىپ قېلىڭكى، ئەقىللىق ئىنساننىڭ"ئىلىم-پەن"بىلەن ئۇيغۇن كەلگەن نەرسىدىن باشقىسىغا ئىشەنمەيمەن دەپ غاپىللىق ۋە نادانلىق تورىغا چۈشۈپ قېلىشى توغرا ئەمەس.ئۇ پەقەت جىنلارنىڭ ياكى پەرىشتىلەرنىڭ بارلىقىنى كۆرمىگەنلىكى ياكى ھېس قىلمىغانلىقى ئۈچۈن ئۇلارنى ئىنكار قىلىپ كۆرەڭلەيدۇ.

شۇنىسى ئېنىقكى، بۇ دەرىجىدىكى بىلەرمەنلىك نادانلىقى(كۆرمىدىمغۇ)دېگەن بىر سەۋەب ئۈچۈن كۆپلىگەن بار نەرسىلەرنى ئىنكار قىلىشقا سەۋەب بولىدۇ.ئۆزىنى ھۆرمەتلەيدىغان ئەقىللىق ئىنسان مۇنداق قالايمىقان جۆلىمەيدۇ.

ئىلىم دېگەن سۆزنىڭ مەنىسىنى چۈشەنگەن ۋە "بىر نەرسىنى ھېس قىلالماسلىق ئۇ نەرسىنىڭ يوقلىقىنى تەقەززار قىلمايدۇ"يەنى سېنىڭ بىر نەرسىنى كۆرەلمەسلىكىڭ ئۇ نەرسىنىڭ يوق ئىكەنلىكىنى تەقەززا قىلمايدۇ،دېگەن مەشھۇر قائىدىنى قايسى بىر ئەقىللىق ئىنسان چۈشىنىدۇ.چۈنكى مەۋجۇت بولغان نەرسىلەر كۆرۈلۈۋاتقان نەرسىلەردىن ئومۇمى ۋە كۆپ،يەنى بارلىق مەۋجۇت بولغان نەرسىلەر كۆرۈش ياكى ھېسسى ئەزالارغا بويسۇنۇپ كەتمەيدۇ.

ئۇنداق ئەمەس دەپ قالسىڭىز سىزگە بىر مىسال كەلتۈرۈپ بېرەيلى،ئالدىڭىزدا بىر ماشىنا تۇرغان بولسا ماشىنىنى كۆرگەنلىكىڭىز ئۈچۈن ماشىنىنىڭ بارلىقىغا ئىشىنىسىز شۇنداقمۇ؟ ئەگەر ماشىنا سىز كۆرەلمەيدىغان ياكى سىز ھېس قىلالمايدىغان يىراقلىققا يۈرۈپ كېتىپ، ھېس قىلىش دائىرىڭىزدىن چىقىپ كەتكەن بولسا، ماشىنىنىڭ بارلىقىغا ئىشىنەمسىز ياكى ئىنكار قىلامسىز؟!

يەنە شۇنى بىلىش كېرەككى،بىر نەرسىنىڭ بارلىقى ئىلمىي پاكىت بىلەن ئىسپاتلانمىسا، ئۇ نەرسىگە ئىشىنىشىڭىز توغرا ئەمەس، شۇنداقلا بىر نەرسىنىڭ يوق ئىكەنلىكى ئىلمىي پاكىت بىلەن ئىسپاتلانمىسا، ئۇ نەرسىنىڭ يوق ئىكەنلىكىگىمۇ ئىشەنمەسلىكنىڭ كېرەكلىكى بەزى ئادەملەرنىڭ زېھنىدىن يىراق بولسا كېرەك.ئەگەر ئىلمىي پاكىت بىر نەرسىنىڭ بار ياكى يوق ئىكەنلىكىنى ئىسپاتلاپ بېرەلمىسە، بۇ چاغدا ئىنسان بۇ نەرسىگە قارىتا نادان بولىدۇ يەنى ئۇ توغرىدا ئېنىق ۋە كەسكىن بىر نەرسە دېيەلمەيدۇ.ئەمدى سېنىڭ بىر نەرسىنى بىلمەسلىكىڭ ئۇ نەرسىنىڭ يوق ئىكەنلىكىنى ياكى بارلىقىنى تەقەززا قىلمايدۇ، چۈنكى بىلمەسلىك سېنىڭ ئۆزۈڭدىكى سۈپەت، ئۇ سەن بىلمەي ئىزدىنىۋاتقان نەرسىدىكى سۈپەت ئەمەس.

ئەگەر كەسكىن ئىلمىي پاكىت بىر نەرسىنىڭ بار ياكى يوقلىقىنى ئاشكارىلاپ بەرسە، سېنىڭ ئاشۇ نەرسىنى بىلمەسلىكىڭ تۈپەيلى ئۇ كەسكىن پاكىت بىلەن قارشىلىشىپ تۇرۇشۇڭ نادانلىق ھېسابلىنىدۇ.

قۇرئان كەرىمدە كەسكىن ۋە ئېنىق ھالەتتە پەرىشتە ۋە جىنلارنىڭ بارلىقى توغرۇلۇق خەۋەرلەر كەلدى.ئۇنداقتا قۇرئان كەرىمنىڭ ئايەتلىرىنىڭ ئىلاھى ۋەھىي ئىكەنلىكىگە ئىشىنىشىڭىز لازىم.قۇرئان كەرىم مۇھەممەد ئەلەيھىسسالامنىڭ يېزىۋالغان كىتاۋى ئەمەس، قۇرئان كەرىم ئاللاھنىڭ سۆزى،بۇنىڭ پاكىتلىرى ساناقسىز.سەن ئاللاھغا، مۇھەممەد ئەلەيھىسسالامغا ۋە قۇرئان كەرىمگە ئىشىنىدىغان بولساڭ، قۇرئان كەرىمنىڭ خەۋىرىگە ئىمان كەلتۈرۈشۈڭ لازىم، سېنىڭ ئىلگىرى بۇ مەسىلىنى بىلمەسلىكىڭنىڭ قۇرئان كەرىم خەۋىرى ئالدىدا قىلچە قىممىتى يوق.

پەرىشتە ۋە جىنلارنىڭ بارلىقىغا ئالاقىدار پاكىتلارنىڭ قىممىتى ھەممىدىن ئىلگىرى ئاللاھنىڭ بارلىقىغا ئىشىنىشكە تايىنىدۇ. كىم ئاللاھغا ئىشەنمەيدىغان بولسا، ئۇ خەۋەرنىڭ مەنبەسى(يەنى قۇرئان كەرىم)نى تەستىقلىسۇن ياكى ئىشەنمىسۇن ئۇنىڭ كارى چاغلىق، ئۇ ئاللاھغا ئىشەنمەيدىغان بولغاندىكىن قۇرئان كەرىمنىڭ خەۋىرىگە ئىشەنمەسلىكى تەبىئىى مەسىلە.

لېكىن ئۆزىنى مۇسۇلمان دەپ تۇرۇپ، ئاللاھغا،پەيغەمبەرگە ۋە قۇرئانغا ئىشىنىمەن دەپ دەۋا قىلىدىغان مۇسۇلماننىڭ جىننىڭ بارلىقى توغرىسىدا قۇرئان كەرىم بىلەن جېدەل قىلىشى ئاجايىپ ئەخمەقلىق ئەمەسمۇ! بۇ ئەخمەقنىڭ(مەن جىننى كۆرمىدىم ياكى ھېس قىلىپ باقمىدىم)دېگەندىن باشقا دەلىلى يوق، يەنى ئۇنىڭ نادانلىقى ۋە بىلمەسلىكىدىن باشقا ھېچقانداق پاكىتى يوق.

دېمەك،بۇ يەردىكى مەسىلە، يەنى ئۇنىڭ مۇسۇلمان تۇرۇپ جىنلارنىڭ بارلىقىنى ئىنكار قىلىشى ئىسلامغا قارىشى سەپتىكى شەرقشۇناسلار ۋە ئىسلام ئىدىيىسىگە ھۇجۇم قىلغۇچى ئاتېئىزمچى دۈشمەنلەرگە ئەگەشكەنلىكتىن باشقا نەرسە ئەمەس.چۈنكى شەرقشۇناس ۋە ئىسلامغا قارىشى سەپتىكى ئىدىيە دۈشمەنلىرى:جىن،شەيتان ۋە پەرىشتىلەرنىڭ بارلىقىغا ئىشىنىش ئەرەبلەردە جانلانغان خۇراپاتلار ئىدى، مۇھەممەد پەيغەمبەر بولۇپ كەلگەندىن كېيىن ئىسلام نامى بىلەن ئەنە ئاشۇ خۇراپاتلارغا چاقىرغان،دەپ تەشۋىق قىلىشىدۇ ۋە ئىدىيىسى بۇزۇق ياكى ئىدىيىسى ساپ بولمىغان مۇسۇلمان دەۋاگەرلىرى بۇلارنىڭ بۇ غەرەزلىك ئىدىيە ھۇجۇم سۆزلىرىنى ئىلمىي ھەقىقەت دەپ پەرەز قىلىشىدۇ،ھالبۇكى بۇ غەرب ۋە روس شەرقشۇناسلىرىغا ئىدىيە جەھەتتىن قۇل بولغانلىقتۇر، بۇ مەخلۇقلار ئۇلارنىڭ بۇ سەپسەتىلىرىنى تەكشۈرۈشتىن كۆزلىرى ۋە ئەقىللىرىنى يۇمىلىۋالىدۇ، قارىغۇلارچە شەرقشۇناسلارنىڭ سۆزلىرىنى تەكرارلايدۇ ۋە پەرەزلىرىنى ئىلمى ھەقىقەت دەپ جار سېلىشىدۇ!

كۆزى كۆرمىگەن ۋە تەجرىبىگە بويسۇنمايدىغان نەرسىگە ئىشەنمەيدىغان شەرقشۇناسلار ۋە ئىدىيە دۈشمەنلىرى بىر مەزگىلدىن كېيىن روھ، روھ بىلەن سۆزلىشىش ۋە روھ بىلەن پاراڭلىشىش شەكلى توغرىسىدا سۆزلىگەن ۋاقتىدا، ئىدىيىسى بۇزۇلغان ۋە ئەقلى ئېچىلمىغان بىر قىسىم مۇسۇلمانلار يەنە ئۇلارنىڭ سۆزلىرىنى ئۇدۇللا ئىلمىي ھەقىقەت دەپ تەستىقلايدۇ. بۇرۇن سەن روھنى ئىنكار قىلاتتىڭغۇ؟ روھنىڭ بارلىقىغا ئىشەنمىگەنتىڭ ۋە بىزگە شۇنداق تەشۋىقات قىلغان ئىدىڭ؟ئەمدى ئۆزۈڭ روھ توغرىسىدا سۆزلەپ كېتىپسەنغۇ؟دېيىشىنى بىلمەيدۇ بۇ ھاڭۋاقتىلار...

مانا بۇنىڭدىنمۇ ئېغىر ئەخمەقلىق بولامدۇ؟

سەن بۇ ئەخمەقلەردىن بىرەرسىنى ئىلمىي پاكىت-ئىلمىي پاكىتنىڭ ئىنچىكە ئىدىيە مېتودى بويىچە-ئالدىدا توختىتىپ قويساڭ،تېخى بۇ ئەخمەقلەرنىڭ بىرەرسى ساڭا ئىلىم-پەن ۋە ئىلىم-پەن دەلىلى نامى بىلەن كۆرەڭلەيدۇ ۋە يوغانچىلىق قىلىدۇ.ئەگەر سەن غەرب ياكى رۇسىيىلىك بەزى شەرقشۇناسلىرىنىڭ ماركسىزمچە ئاقماس سەپسەتىلىرىنى بۇ ئەخمەقلەرگە نەقىل قىلىپ قالساڭ،ئويلانماستىن ئۇدۇل باش ئېگىدۇ ۋە ئۇلارنىڭ پەرەز ۋە سەپسەتىلىرىنى ئىلمىي ھەقىقەت دەپ قوبۇل قىلىدۇ.

سەن ئىلىم دەپ ئاتاۋاتقان ئىلىم قانداق ئىلىم؟سېنىڭ كاللاڭدا چايقىلىۋاتقان ئىلىم-پەن پاكىتى قانداق پاكىت؟سەن تېخى ئۆزۈڭنىڭ مۇستەقىل ئەقلىڭ بىلەن تەپەككۈر قىلىش سالاھىيىتىنى يېتىلدۈرمىگەن ئادەمغۇ؟باشقىلارنىڭ سۆزلىرىنى نەقىل قىلىپ يۆتكەشتىن باشقا سەندە نېمە ئىلمىي پاكىت بار؟

 "ساغرىسى سۇدا،بېشى ئاسماندا"دېگەن شۇ دە!

دېمەك،سەن ئاللاھغا،مۇھەممەد پەيغەمبەرگە ۋە قۇرئانغا ئىشىنىدىغان مۇسۇلمان بولساڭ، جىننىڭ بارلىقىغا ئىشىنىسەن. ئەگەر ئاللاھغا ئىشەنمەيدىغان ئاتېئىست بولساڭ، جىننىڭ بارلىقىغا ئىشەنمەيسەن.سەن ئىلىم-پەن نامىنى خاتا قوللىنىپ باشقىلارنى ئازدۇرما، ئىلىم-پەن سەندەك ئەگەشمە ۋە تەپەككۈرسىز سۆرەلمە ئەقىلدىن بىزار!!!.

 

 

 

ظعسلام ظاؤازع تور بئتع

2007-يعلع 9-ظاينعث 1-كإنع

1428- شةظبان- 19 هعجرعية